Is i bana-ghaisgeach airson na Gàidhlig oileanach na bliadhna aig Sabhal Mòr Ostaig UHI

Foillsichte 07 Iuchar 2011

Agus i às a’ Ghàidhealtachd o thùs, shiubhail Heather Clyne air feadh an t-saoghail mar neach-saidheans mara às dèidh dhi ceumannan a dhèanamh ann an Dùn Dèagh agus Dùn Èideann - ach tha i a-nis gu sònraichte pròiseil à bhith ag ionnsachadh aig Sabhal Mòr Ostaig UHI, pàirt de dh’Oilthigh na Gàidhealtachd agus nan Eilean.

Thathas air Heather, a tha an treas bliadhna a’ chùrsa cheuma Cànan is Cultar na Gàidhlig, ainmeachadh mar oileanach na bliadhna aig Sabhal Mòr Ostaig UHI, mar aithneachadh air na rinn i airson na Gàidhlig agus air a comas acadaimigeach. 

Nuair a bha i na sgoilear, bha Heather an sàs ann an cruinneachaidhean fhìdhleirean a chuidich gus airgead a thogail dhan cholaiste Ghàidhlig - agus, nas anmoiche, nuair a bha i a’ dèanamh cùrsa aig Colaiste Inbhir Nis, tha cuimhne aice gun robh i air bhioran is i a’ cluinntinn mu chruthachadh Oilthigh na Gàidhealtachd agus nan Eilean.

Cha robh UHI ann tràth gu leòr do Heather, a chaidh air adhart a dhèanamh ceum ann an saidheans bith-eòlach an Dùn Dèagh, agus PhD ann am modaileadh coimpiutaireach agus saidheans mhucan-mara aig Oilthigh Napier, Dùn Èideann. Mar phàirt den dreuchd aice bha i an sàs ann an tuathanas èisg agus rianachd mhara àrainneachdail an dà chuid aig an taigh agus thall thairis.

Thuirt i fhèin: “Is e rud a bu toigh leamsa gu mòr an cothrom a bhith agam ionnsachadh san sgìre agam fhèin, ach cha robh an cothrom sin ann aig an àm. Bha mise am measg nan iomadach Gàidheal a b’fheudar falbh.

“Tha mi a-nis a’ toirt mòr-mhiann gu buil is mi ag ionnsachadh aig Sabhal Mòr Ostaig UHI mar phàirt den oilthigh againn fhèin. Is e rud a tha sin a bha daonnan nam inntinn.”

Cho math ri bhith a’ togail a cuid chloinne agus a’ dèanamh obair chùrsa de dh’àrd inbhe, the Heather air a bogadh fhèin ann am beatha na colaiste agus na coimhearsnachd nas fharsainge. Bidh i a’ cuideachadh gus turais a-mach agus co-labhairtean a chur air dòigh; a’ dràibheadh bus na colaiste, a bhios ga dhèanamh comasach do dh’oileanaich eile pàirt a ghabhail ann am farsaingeachd de ghnìomhachdan; a’ cur seachad ùine a’ cur phàipearan colaisteach ann an tasglann agus bha i an sàs ann am pantomaim Gàidhlig, an dà chuid air an àrd-ùrlar agus air cùl ghnothaichean, na bu tràithe air a’ bhliadhna.

Bhuannaich i duais Chomann na Gàidhlig san Dàmhair an-uiridh airson daoine a bhrosnachadh a bhith a’ dèanamh feum den Ghàidhlig, agus thuirt stiùiriche a cùrsa, Mark Wringe, gur e deagh eisimpleir a th’innte mar thoradh air cho dealasach ’s a tha i airson na Gàidhlig, agus cho càirdeil ’s a tha i.

“Tha Heather air a bhith gu sònraichte soirbheachail a thaobh oileanaich eile a bhrosnachadh gus àrainneachd Ghàidhlig a chruthachadh, agus tha seo gun teagamh air sgàth dòigh a bhith aice a tha cho càirdeil, cho smaoineachail, cho mothachail is cho inntleachdach agus i a bhith a’ gabhail a h-uile duine a-steach, rud a dh’fhàgas gu bheil meas mòr oirre am measg nan oileanach,” thuirt esan.

Agus i à Gleann Fhionnainn o thùs, agus a-nis a’ fuireach san Eilean Sgitheanach, choisinn Heather àrd mholadh bho bhreitheamh farpais bàrdachd a thuirt gum b’ e euchd air leth do neach-ionnsachaidh inbheach an stoidhle agus an fhìrinn a bha na cuid obrach.  

Tha Heather a’ buannachadh £100 mar oileanach na bliadhna Shabhal Mòr Ostaig UHI agus thèid i air adhart a-nis mar thagraiche airson oileanach na bliadhna UHI air fad, còmhla ri buannaichean eile bho àrainnean air feadh na sgìre. 

Rinn Mark moladh air Heather mar an seòrsa oileanach aig a bheil feum air Oilthigh na Gàidhealtachd agus nan Eilean agus air a bheil UHI fhèin feumach - “inbhich thogarrach, dhealasach às an sgìre a tha airson fuireach an seo, ionnsachadh an seo, agus feabhas a thoirt air na tha ro na coimhearsnachdan againn san àm ri teachd.” 

“Agus i air a togail ann an Gleann Fhionnainn agus Mùideart, tha i a’ cur luach mòr air a’ chomas a bhith ag ionnsachadh airson ceum gun a bhith a’ fàgail na Gàidhealtachd,” thuirt esan.

Bha Heather airson Gàidhlig ionnsachadh o chionn bhliadhnaichean agus tha i air leth toilichte gun urrainn dhi a h-ionnsachadh tro Shabhal Mòr Ostaig UHI a-nis. ’S ann dà-chànanach a tha an triùir chloinne aice, Fhian 18, Christopher, 11 agus Irene, a tha 7 bliadhna a dh’aois.

Nas fhaide air adhart air a’ bhliadhna bidh Heather agus a teaghlach a’dol a dh’Èirinn far am bi Heather ag ionnsachadh aig Colaiste Oilthigh Bhaile Àth Cliath mar phàirt de phrògram iomlaid airson na bliadhna urraim aice.

Neach-conaltraidh nam meadhanan
Glenda Johnson
Oifigear UHI airson Dhàimhean ris na Meadhanan
01463 279222
Glenda.johnson@uhi.ac.uk