Taisbeanaidhean Ghuthan nan Eilean a’ toirt cuireadh do choimhearsnachdan na sgeulachdan aca a phàirteachadh
Tha Oilthigh na Gàidhealtachd agus nan Eilean (UHI) a’ toirt taic do shreath de thaisbeanaidhean samhraidh a tha a’ leigeil ris pròiseact dualchas coimhearsnachd ioma-chànanach Ghuthan nan Eilean, agus cuireadh ann do luchd-tadhail a bhith a’ pàirteachadh nan rudan as cuimhne leotha fhèin, cho math ri an smuaintean is am beachdan mar phàirt den iomairt.
Thèid na taisbeanaidhean a chumail ann an àitichean sna h-eileanan agus air tìr-mòr mus tèid tasglann didseatach làn-chatalogaichte a chur fo sheòl as t-fhoghar, le taic bho Mhaoin Dualchais a’ Chrannchuir Nàiseanta.
Agus e air a thòiseachadh ann an coimhearsnachdan anns na h-Eileanan Siar, tha pròiseact Ghuthan nan Eilean air còrr is 500 clàradh bhidio a chruinneachadh a’ gabhail tlachd ann an cainnt-bheòil, dualchas ionadail agus sgeulachdan pearsanta. Bidh taisbeanadh ùr le àrd-phuingean bhon chruinneachadh ri fhaighinn bho dheireadh an Ògmhios gu meadhan an Lùnastail aig ionadan air feadh Uibhist a Tuath, Beinn a’ Bhaoghla agus Uibhist a Deas.
Bidh e comasach do luchd-tadhail film goirid fhaicinn le taghadh de stuth agus barrachd ionnsachadh mun phròiseact tro thaisbeanaidhean agus còdan QR a bheir ceangal ris a’ chruinneachadh air-loidhne gu lèir.
Bidh dàrna taisbeanadh, air a chruthachadh ann an com-pàirteachas le Caraidean Phàirc na Banrigh ann an Glaschu, a’ cur fòcas air co-obrachaidhean ùra le còignear sgrìobhadairean a tha ag obair ann an caochladh chànanan dualchais co-aimsireil. Fosglaidh an taisbeanadh san Iuchar ann an Gàrradh Ròsan Bàrdachd na h-Alba agus bidh oidhche de leughaidhean bàrdachd agus taisbeanaidhean film ann roimhe, anns an nochd sgrìobhadairean a tha a’ gabhail pàirt agus aoighean sònraichte.
Rud sònraichte mun dà thaisbeanadh, is e gu bheil cuireadh do luchd-tadhail na freagairtean aca fhèin a thoirt seachad. Gabhaidh fios-air-ais toirt seachad ann an sgrìobhadh no tro theachdaireachd gutha, rud a tha a rèir fòcas a’ phròiseict air cainnt-bheòil agus com-pàirteachadh le coimhearsnachdan.
Thuirt Gordon Wells, co-òrdanaiche pròiseict Ghuthan nan Eilean:
“Bhiodh sinn a’ cur fàilte chridheil air fios bho luchd-tadhail agus com-pàirtichean ann an Gàidhlig no Beurla. B’ fhìor thoil leinn cluinntinn dè tha daoine a’ smaoineachadh den phròiseact, rud sam bith a bhios air a dhùsgadh aige nan cuimhne, no beachdan air an leasachadh a ghabhadh dèanamh air a-rithist.
“Bidh sinn a’ cur a cheart uiread de dh’fhàilte air teachdaireachdan gutha ’s a bhios sinn air puist-d – is dòcha barrachd, leis an fhòcas a tha am pròiseact a’ cur air cainnt-bheòil agus guthan choimhearsnachdan.”
Tha am pròiseact air tasglann mhòr air-loidhne a chruthachadh thar grunn bhliadhnaichean agus is e an rùn a th’ aige dualchas cànaineach is cultarail choimhearsnachdan eileanach a ghleidheadh agus a mhòrachadh agus cothroman a chruthachadh airson còmhraidhean is ceanglaichean ùra.
Gabhaidh fios-air-ais cur a-steach le bhith a’ fònadh 01463 279110 no le bhith a’ cur post-d gu: islandvoices@uhicloud.ac.uk
Cinn-latha agus suidheachaidhean nan taisbeanaidhean
- Taigh Chearsabhagh, Loch nam Madadh (le Comann Ealain Uibhist)
26 Ògmhios gu 14 Lùnastal
- Museum nan Eilean, Lionacleit
30 Ògmhios gu 14 Lùnastal
- Cnoc Soilleir, Dalabrog
30 Ògmhios gu 14 Lùnastal
- Talla Eaglais Paraiste Phàirc na Banrigh Cnoc a’ Ghobhainn, Glaschu
Oidhche Bàrdachd is Film
7f gu 9f, Disathairne 11 Iuchar
- Gàrradh Ròsan Bàrdachd na h-Alba, Pàirc na Banrigh, Glaschu
Taisbeanadh Chòig Sgrìobhadairean
Bho 2.30f, Didòmhnaich 12 Iuchar
Thèid pròiseact Ghuthan nan Eilean a thaisbeanadh cuideachd do riochdairean a bhios an làthair aig co-labhairt eadar-nàiseanta Rannsachadh na Gàidhlig aig Oilthigh Ghlaschu Diciadain 15 Iuchar.
Airson tuilleadh fiosrachaidh mu Ghuthan nan Eilean, theirigibh chun: guthan.wordpress.com.