Bidh oileanaich a’ taghadh cosgais bith-beò agus a’ choimhearsnachd mar phrìomhachasan airson a’ chùmhnant com-pàirteachais ùir aig UHI
Tha oileanaich air gnìomh a thaobh èiginn cosgais bith-beò agus leasachadh coimhearsnachd nan oileanach a thaghadh mar an dà phrìomhachas airson Aonta Com-pàirteachais Oileanaich ùr eadar Oilthigh na Gàidhealtachd ’s nan Eilean (UHI) agus Comann Oileanaich na Gàidhealtachd ’s nan Eilean (HISA).
Tha an t-aonta a’ mìneachadh mar a bhios oileanaich agus luchd-obrach ag obair còmhla eadar 2026 agus 2029 gus eòlas nan oileanach a leasachadh air feadh UHI agus a com-pàirtichean acadaimigeach. Chaidh na prìomhachasan a thaghadh tro bhòt oileanaich, an dèidh sgrùdadh a dhèanamh air toraidhean suirbhidh agus fios air ais eile bho oileanaich.
Nì an obair air cosgais- bith-beò sgrùdadh air taic a thaobh ionmhas agus feumalachdan bunaiteach, taic do dh’oileanaich ann an àite-fuirich air màl, agus cosgaisean falaichte co-cheangailte ri cùrsaichean.
Cuiridh an obair air coimhearsnachd nan oileanach fòcas air sàbhailteachd agus spèis air an àrainn, a’ dèiligeadh ri aonaranachd, agus a’ conaltradh ri oileanaich mun fhaireachdainn aca a thaobh na coimhearsnachd.
Bidh buidheann sònraichte ann airson gach prìomhachas, air a stiùireadh còmhla ri oifigear HISA, ball-luchd-obrach HISA agus ball-luchd-obrach UHI. Tha an t-aonta ag ràdh gum feumar co-dhùnaidhean a dhèanamh ann an com-pàirteachas, agus gun toir beachdan nan oileanach buaidh air an obair tron chearcall trì-bliadhna aice.
Tha an t-aonta ùr cuideachd a’ nochdadh adhartas a chaidh a dhèanamh fo aonta 2024 –2026. Bha seo a’ gabhail a-steach atharrachaidhean air trèanadh agus taic do Riochdairean Guth nan Oileanach, le 572 riochdaire nan àite ann an 2026. Chuir HISA seachd lìonraidhean oileanaich air bhog, agus ràinig àireamh nam ball anns na clubaichean agus na comainn aca 1,080 ann an 2026.
Thuirt Vicki Nairn, Prìomh-Oifigear agus Iar-Sheansalair UHI:
“Tha fios aig na h-oileanaich againn càite an gabh an t-eòlas aca a leasachadh, agus tha a’ bhòt aca air dà phrìomhachas soilleir a thoirt dhuinn. Tha cosgais bith-beò a’ toirt buaidh air comas nan oileanach pàirt a ghabhail anns na sgrùdaidhean aca, agus tha e deatamach gum bi iad a’ faireachdainn sàbhailte agus ceangailte ri chèile fhad ’s a tha iad aig UHI. Tha an t-aonta seo a’ toirt dhuinn dòigh air obrachadh còmhla ri HISA agus oileanaich air feadh a’ chom-pàirteachais againn air atharrachaidhean practaigeach, agus cumail oirnn ag èisteachd fhad ’s a tha an obair sin a’ dol air adhart.”
Thuirt Oliver Sweeney, Ceann-suidhe HISA airson 2026-27:
“’S e an Còrdadh Com-pàirteachais Oileanaich ùr seo a’ chiad cheum ann an nì a tha a’ gealltainn a bhith na àm air leth airson co-obrachadh eadar Comann Oileanaich na Gàidhealtachd is nan Eilean (HISA) agus com-pàirteachas Oilthigh na Gàidhealtachd is nan Eilean (UHI). Tha oileanaich air iarraidh oirnn prìomhachas a thoirt do bhith a’ leasachadh coimhearsnachd nan oileanach, a bharrachd air taic a chur an gnìomh a thaobh cùis-èiginn na cosgais bith-beò a tha romhpa. Tha sinn air cluinntinn bho oileanaich air feadh a’ chom-pàirteachais mun bhuaidh a tha aig na cùisean seo air an cuid foghlaim agus air an turas aca mar oileanaich, agus tha mi air bhioran a bhith ag obair còmhla ri co-obraichean aig HISA agus UHI air na cùisean seo, agus a’ lìbhrigeadh an atharrachaidh fhollaisich dha na h-oileanaich againn a tha iad ag iarraidh fhaicinn.”
Tha an Còrdadh Com-pàirteachais Oileanaich slàn ri fhaighinn air làrach-lìn UHI.